Sambilog pang impeachment complaint kontra kay Vice President Sara Duterte ro nakataeanang igapasaka sa Kamara de Representantes.
Raya ro ginkumpirma ni ACT Teachers party-list Rep. France Castro sa interview it Bombo Radyo Kalibo.
Suno kana nga raya hay pagapangunahan it Makabayan bloc nga ginaeakipan it tatlong party-list group sa Kamara.
Magadihon sigon sanda it ikaywang impeachment complaint kontra kay Duterte sa sueod it makaron nga domingo kasunod it pagdihon it nagkaeain-eain nga advocacy group it unang impeachment complaint.
Ginpahayag ni Castro nga presente nanda nga gina-istoryahan kaibahan ro iba pang mga peoples organization ro andang inisyatibo agud nga ma-impeach ro Bise Presidente.
Nagapati imaw nga kinahangean nga magpasakop ro nagkaeain-eain nga sektor it sosyudad sa nasambit nga tikang agud nga maging maeapad ro representasyon it igapasaka nga impeachment.
Owa eon imaw nagtau it dugang nga detalye angot sa mga baeasihan it ikaywang reklamo bangud nga presente pa nanda nga ginatapos ro draft kara.
Kahapon nga adlaw it Lunes, 17 nga katawo nga ginaeakipan it mga representante halin mula sa mga civil society organizations, mga organisasyong masa, relihiyosong grupo, mga pamilya it mga biktima it Oplan Tokhang, ag iba pang grupong adbokasiya ro nag file it unang impeachment complaint kontra kay Duterte.
Kaibahan sa mga ginbasehan hay ro culpable violation of the Constitution, graft and corruption, bribery, betrayal of public trust, ag iba pang mabahoe nga krimen.
May una nga 24 nga artikulo ro reklamo nga ginaeakipan it ginasugid nga saea nga paggamit it confidential funds, mga extra-judicial killings ko tiempo it anang pagpanerbisyo bilang alkalde it siyudad it Davao, ag mga pagpamaeag sa kabuhi ni Pangueong Ferdinand Marcos, ag iba pa.
Gin endorso ro nasambit nga reklamo ni Akbayan Party-list Representative Perci Cendana.
