KALIBO, Aklan—Makabig nga espesyal ro Setyembre 8 para sa mga deboto ni Virgin Mary ag sa mga Katoliko.
Raya hay bangud nga ginaselebrar ro kapiestahan it pagkatawo ni Blessed Virgin Mary, ro ina ni Hesukristo.
Ginpaathag ni Fr. Joefrey Jimenez, Parish Team Moderator it St. Jude Thaddeus Parish Church nga sa tradisyon it simbahan, tatlong kaadlawan ro ginadumdum sa liturgical year.
Raya hay ro pagkatawo ni Hesukristo sa Disyembre 25, ro pag-unga kay Birheng Maria makaron nga adlaw ag ro kaadlawan ni San Juan Bautista kada Hunyo 24.
Ro nasambit suno kana nga selebrasyon hay nagatumod sa personalidad ag sa misyon kara kay Hesukristo.
Gindugang pa ni Fr. Jimenez nga sangka prebilehiyo nga mapili imaw bilang tagabun-ag it unga it Diyos.
Bangud kara, ginakilaea it mga Kristiyano si Maria bilang pinakatumaeagsahon nga unga nga babaye it Ama.
Dapat suno kana nga magpasaeamat kita bangud nga pinaagi kay Maria hay ginpakita it Ama ro anang kaeo-oy ag malasakit para katon.
Sa anang kaadlawan, dayawon naton ro Diyos bangud kay Maria.
Sundan naton si Hesus sa tapak ni Maria agud nga pareho nana hay tan-awon kita it Diyos it may kaeo-oy ag pagpalangga.
