Ginkumpirma it infectious disease expert nga si Dr. Rontgene Solante nga nailista eon iya sa Pilipinas ro makamaeatay nga bacterial infection nga streptococcal toxic shock syndrome (STSS) nga eapnaag makaron sa Japan.
Suno kay Dr. Solante, ro sakit hay tuga it bacteria nga nagadaea it pharyngitis ukon paghaeok it pharynx apang posibleng magresulta sa malala nga komplikasyon kon raya hay magkalhit sa iligan it dugo.
Paathag pa it eksperto nga nagaumpisa ro nasambit nga impeksiyon sa panit nga may nina nga pagasudlan it mikrobyo antes magasueod sa dugo nga makaapekto sa sistema it bilog nga eawas rason nga mapagsik ro bacteria ag madasig nga magkalhit sa eawas.
Dugang pa ni Solante nga may una raya nga 30% nga mortality rate nga ro buot hambaeon hay pwedeng mamatay sa sueod it 24 oras ro sangka na-impeksiyon nga indibidwal matapos mag-umpisang makit-an ro mga sintomas kaparehas it eagnat, pagpanakit it eawas, pagkahapo, pagsuka ag pag-itom it nina nga pwedeng umabot sa manabang blood pressure.
Angot kara, ginlaygayan it eksperto ro publiko nga magsuksok it face mask ag hugasan it mayad ro mga nina kon may una gidman samtang ro mga nakakaeksperyensya it sintomas it sakit hay insigidang magpakonsulta sa doktor para maeapatan it medikasyon.
