KALIBO, Aklan—Ginkumpirma it Makato Municipal Police Station nga may person of interest eon sanda sa kaso it pagtadtad it buno sa sangka construction worker nga nasapwan nga owa it kabuhi sa sueod it anang kwarto sa andang baeay sa Sitio Nabanglid, Brgy. Tina, Makato, bandang alas-7:00 it agahon it Sabado, Mayo 18.
Nakilaea ro biktima nga si Vincent Capnao, 24-anyos nga naga-isaeahanon nga naga-istar sa anang baeay.
Suno kay P/Cpl. Kate Tumaca, tagapaghambae it Makato PNP nga nagapadayun pa ro andang ginapatigayon nga imbestigasyon partikular ro pagtumod sa motibo it krimen .
Sa pihak nga may natumod eon nga person of interest sa kaso, apang kinahangean pa nanda ro dugang nga detalye antes nga ibulgar ro anang pagkatawo kamana man ro mga posibleng kasabwat kara.
Ginatukib pa it kapulisan ro posibilidad nga bukon eamang it sambilog ro may kahimuan sa krimen.
Base sa resulta it post mortem examination, nag angkon it siyam nga igo it pagbuno ro biktima sa nagkaeain-eain nga parte it anang eawas kaibahan ro mga defensive wound sa anang alima kun sa siin ro patal nga lastro hay sa anang dughan ag tiyan .
Ginpahayag dugang nga antes nga natabu ro krimen hay nakita pa ro biktima nga nakikipag-inuman sa anang mga igkampod maeapit sa anang baeay.
Naabutan ro biktima nga nagapaligos sa anang kaugalingon nga dugo sa anang eugban it anang himata nga magadaea kunta kana it bugas .
Ginpasiguro man it kapulisan nga gina-obra nanda ro tanan agud nga mataw-an it hustisya ro pagkamatay it biktima ag mapabilin ro peace and order sa nasambit nga banwa.
