MAKATO, Aklan—Nakaplastar eon ro ginahimo nga preparasyon it Makato Municipal Police Station para masiguro ro seguridad it mga bisita ag deboto sa pagpatigayon it kaugalingon nga bersyon it Sto. Niño Ati-Atihan Festival nga ginaeuman nga magadagsa sa Enero 14 hasta 15.
Suno kay P/Lt. Lyn Ibañez, hepe it Makato MPS nga nagapabilin sanda nga naka alerto umpisa ko holiday season hasta sa paeaabuton nga festival.
Kasado eon suno kana ro andang deployment ag re-routing plan partikular sa mga kalye nga paga-agyan it mga magapasundayag nga mga tribu ag grupo kamana man sa daeagan it trapiko.
Dugang pa nga may iga-augment nga pwersa ro Aklan Police Provincial Office eabi eon sa pinaka highlight it aktibidad.
Magiging kabulig man sigon nanda ro mga auxiliary police, tanod ag iba pang force multipliers.
Gin engganyo man kara ro publiko nga magasaksi sa Ati-Atihan Festival nga maging mapagbantay ag ireport insigida sa mga otoridad ro mga mataeupangdan nga makadueudang indibidwal.
