KALIBO, Aklan–Owa pa nagpatuman it panibag-ong serye it pagpataas it pamasahe ro Makato Transport Cooperative.
Raya hay sa pihak nga nagpagguwa eon it Implementing Rules and Regulation (IRR) ro Land Transportation Franchising and Regulatory Board (LTFRB) angot sa hirit nga dugang nga pamasahe sa mga Public Utility Vehicles.
Suno kay Roger Indaya, presidente it Makato Transport Cooperative nga may ginabuytan eon sanda nga bag-ong taripa apang owa pa raya nanda ginapatuman.
Pagahueaton anay sigon nanda nga mag-implementar ro kaibahan nandang transport cooperative sa Western Terminal para dungan nga ipatuman ro bag-ong panueoktan.
Sa makaron, nagapabilin sa P20 ro pamasahe sa regular nga pasahero samtang P16 man sa mga estudyante, senior citizen ag PWD halin Kalibo to Makato vice versa.
Angot kara, nagaeum sigon sanda nga makabaton it dugang nga fuel subsidy halin sa gobyerno bangud sa nagapadayun nga epekto it sunod-sunod nga pagtaas sa presyo it petrolyo.
