KALIBO, Aklan–Nagviral ag naghakot it nagkaeain eain nga reaction maghalin sa mga netizens sa social media ro mga video it sangka Aklanon nga may kaangtanan sa anang gina-ubra nga make-up transformation nga may mensaheng gusto nga ipaabot nga nagakonekta sa pilang ka mga social issues.
Sa makarun hay nag-abot eun it masobra sa 1.2M views ro daywa sa mga videos nga gin-upload ni Lorenzo Matorres, sangka government employee nga nagatrabaho sa Aklan Provincial Hospital ag freelance make-up artist.
Ro anang pinakaulihing videos nga nagtrend sa facebook ag Tiktok hay ro may kaangtanan sa selebrasyon it International Women’s Month kung sa sin anang ginpakita kung mauno ka importante ro papel it mga kababayin-an pamaagi sa anang make-up transformation.
Sa interbyu it Bombo Radyo ginpahayag ni Matorres nga eubos ro anang kalipay nga nababatyagan bangud nagustuhan it publiko ro anang gina-ubra.
Suno pa kana nga nakahiligan eun nana nga magpaabot it mensahe sa kaabuan rason nga kat nadiskubre nana ro anang talento sa pag make-up hay naisipan nana nga tuearon ro anang mga nakikita nga videos sa app nga Tiktok.
Ko ulihi hay naging hobby eun sigon nana nga mag-ubra it videos sa kada may mga importanteng selebrasyon.
Samtang, mabahoe man sigon ro anang pagpasaeamat sa anang pamilya ag mga barkada nga suportado ro anang ginahimo.
