Eubos nga ginpamalibaran it Malakanyang ro alegasyon nga ginabaeabagan ni Pang. Ferdinand Marcos Jr. ro impeachment kontra kay Vice President Sara Duterte.
Suno kay Executive Secretary Lucas Bersamin, indi mahimo nga diktahan it ehekutibo ro co-equal branch of government.
Ginklaro ni Bersamin nga ro naunang pahayag ni Pang. Ferdinand Marcos Jr. parte sa impeachment hay opinyon eamang nana kara.
Hakutana abi ro Pangueo kung pabor raya sa impeachment nga indi nana mahimo nga direktang sabton bangud sa impeachment process hay prerogative it Kongreso.
Suno kay Bersamin, mahimo nga naga-isip si Pang. Marcos hay makaabala eamang raya sa pag-usad apang uwa na man raya ginahambae sa Kamara.
Pahayag ni Executive Secretary, kun magdesisyon ro mga mamalidha nga ipadayon ro proseso it impeachment, uwa it paagi para nga baeabagan raya.
Sa pihak nga bahin, diretasahan nga inakusahan it Makabayan Bloc si Pang. Marcos imaw sigon ro rason ngani naantala ro proseso it tatlo nga gindihon nga impeachment complaints kontra kay VP Sara.
Nagpasaring man si ACT Teachers Partylist Rep. France Castro nga mahimo may ikaap-at pa nga impeachment complaint nga igadihon sa Kamara bago euman magbreak ro Kongreso.
