KALIBO, Aklan–Ginpaandaman ni Malay mayor Floribar Bautista ro mga illegal tour guides nga uman nga nagkalhit sa Isla it Boracay.
Ro paandam it alkalde hay tuga it mga nabaton nga reklamo halin sa Department of Tourism angot sa nagatinaas nga numero it mga tourist guides nga bukon it lisensyado.
Suno kana nga ro mga tourist guides sa isla hay nagapaidaeum sa training ag community guiding seminars nga ginpangunahan it Department of Tourism (DOT) ag Municipal Tourism Office para sa tour guiding agud nga mapamayad ro andang pagtau it serbisyo.
Angot kara, mas pang ginpabaskog ro kampanya kontra sa mga bukon it rehistradong tourist guides kaibahan ro composite team halin sa lokal nga gobyerno ag Malay Municipal Police Station sa tunga it padayun nga pagbuhos it mga turista eabi eon ro mga dumueuong.
Ro mga rehistradong tourist guides, coordinators ag escorts hay obligadong magsuksok it ID sa tanan nga oras ag dapat nga maayos ro pagpang-eambong ag ma-respeto sa mga bisita.
Ginabantayan man ro mga raya kon sa impluwensiya it aeak, droga ag eakot sa prostitusyon.
Nasayuran nga naga-abot eon sa 1,189,000 ro numero it tourist arrivals sa Boracay umpisa Enero hasta Agosto it makaron nga dag-on ukon mas mataas it 260 percent kumpara sa nailistang bisita ko 2021 sa kaparehong period.
