KALIBO, Aklan—Uman nga nag-apela si Malay mayor Frolibar Bautista sa mga turista sa isla it Boracay nga likawan ro pagpameke it andang COVID-19 test results kasunod it pagka-aresto eon man sa mga turista sa Caticlan airport.
Suno kay mayor Bautista nga ro daywang turista hay naka-eusot sa airport authorities sa manila , apang nadakpan sa pag-abot sa Caticlan airport ko December 29 matapos nga magpakita it peke nga test results.
Sa pag-usisa it validating team, natukiban it mga otoridad nga owa sanda it reverse transcription polymerase chain reaction (RT-PCR) test results halin sa accredited nga laboratory center sa Manila.
Ro daywa hay nagselebrar it bag-ong dag-on sa quarantine facility ag posibleng magapangatubang pa it nagakaigo nga kaso.
Kadungan kara, nag apela si Bautista sa mga residente nga maging mapagbantay ag indi maging kampante bangud nga masyado suno kana nga delikado engkaso nga may mga turistang makaeusot nga positibo sa nasambit nga sakit.
Sa makaron hay nakalista pa eamang it sangka kaso it Covid-19 sa banwa it malay nga presenteng naka-isolate sa andang pasilidad.
Ro mga turista nga halin sa guwa it aklan hay obligadong magpakita it negative Covid-19 test result ag confirmed hotel booking antes nga makasueod sa boracay.
Mag-eowas kara, kinahangean man sanda nga makaangkon it Quick Response ukon QR code kaibahan ro Online Health Declaration form.
Raya hay pagagamiton it tanan nga mga residente ag turista sa pagsueod sa boracay kamana man sa mga restaurant ag hotel sa isla.
Madumduman nga ko nagtaliwan nga Disyembre 7, an-um nga turista ro gin-aresto ag ginkasuhan it falsification and use of falsified documents sa idaeum it Article 172 it Revised Penal Code sa Aklan Provincial Prosecutor’s Office ko Disyembre 14 matapos nga nagkunchabahan agud nga makahimo it pekeng Covid-19 clearance.
