KALIBO, Aklan—Nakalista it 58 ka mga indibidwal ro Malay municipal health office sa ginpatigayon nga contact tracing kasunod it pagsueod it sambilog sa mga tawuhan it Bureau of Fire Protection (BFP) region VI sa isla it Boracay nga ko ulihi hay nasayuran nga positibo sa Covid-19.
Suno kay Madel Joy Tayco, tagapaghambae it Municipal Inter-agency Task Force on Covid-19 nga sa nasambit nga numero hay 70 porsyento kara hay mga frontliners ag ro iba hay ro usual nga publiko nga nakaibahan nana sa ferry boat.
Ginpaathag nga sa 58 hay makabig nga low risk ro lima kanda ag uwa it maskin anong sintomas rason nga inde eon kinahang-ean nga ipaidaeom sa quarantine samtang ro 53 nga iba pa hay duyon sa makaron ro andang ginatutukan it husto ag ginbutang eon sa quarantine facility kon sa siin idto sanda magapabilin sa sueod it 14 diyas.
Ro ginatinguhaan sigon nanda makaron hay ro makontak mismo si Western Visayas patient 144 nga sangka 26-anyos nga babaye nga makata-o it statement sa iba pa nana nga iterinary sa Boracay para mapaeapad pa ro andang contact tracing.
Nasayuran nga nakatabok sa isla ro BFP personnel ko June 12 bandang alas-5:00 hasta alas-6:00 it gabi-e ag ko June 14 bandang ala-1:40 it hapon imaw nakahalin.
Sa pihak kara, ginduea ni Tayco ro kabaeaka it mga pumueoyo bangud nga ginahimo nanda ro tanan para inde magkalhit ro virus ag padayon man ro anang pag-engganyo sa mga lokal nga turista nga bisitahon ro isla it Boracay nga makaron hay bukas eon raya para sa mga taga-Western Visayas
