Kalibo Aklan ——–Uman nga nagpanawagan ro Malay Municipal Police Station sa mga turista nga gustong magbakasyon sa Isla it Boracay nga likawan ro paggamit it peke nga negatibong RT-PCR swab results .
Raya hay matapos ro sunud-sunod nga pagka-aresto sa mga turista nga may daea eon man nga pekeng dokumento umpisa nga ginbuksan ro Isla sa mga taga-NCR plus .
Suno kay P/Lt. Col. Don Dicksie De Dios, hepe it Malay PNP nga likawan ro paggamit it COVID-19 test results bangud nga mag-eowas nga nagatuga raya it peligro sa mga residente ag kaparehong turista hay mabahoe man ro posibilidad nga uman nga maapektuhan ro industriya it turismo nga makabawi halin sa pagka-eugmok sa pandemya .
Ginklaru ni De Dios nga sa tabon port pa eamang sa Caticlan naaresto ro ap-at nga panibag-ong turista nga nag-peke it dokumento.
Suno kana nga maskin puro sanda taga National Capital Region (NCR) hay naghalin sanda sa Bacolod City .
Maskin nga original apang gin-tampered sigon it mga raya ro petsa it andang swab tests.
Imbes nga masadyang bakasyon, nagapangatubang sanda makaron it kasong pag-eabag sa RA 11332 ukon Madatory Reporting of Notifiable Diseases and Article 172 of Revised Penal Code ukon Falsification of Documents .
Mag-eowas kara, kaibahan man sanda sa mga gindeklarang persona-non-grata it LGU-Kalibo.
Nasayuran nga nagsueod sanda sa boracay ko martes it gabi-i ag matapos matukiban it validation team ro andang mga peke nga dokumento hay insigida sanda nga gin-aresto ag gindaea sa quarantine facility sa Kalibo ag ginahueat eon lang ro resulta it andang swab test.
Madumduman nga ko adlaw it Sabado hay pitong turista ro nadakpan man it peke nga RT-PCR test result kasunod it uman nga pagbukas it Boracay sa mga turista nga naghalin sa NCR plus.
