KALIBO,Aklan– Naging hugot ro pagmonitor it Malay PNP sa bilog nga isla it Boracay kamana man sa mainland Malay antes pa man ro mismong adlaw it selebrasyon it kapistahan ni Sr. San Juan de Bautista kahapon nga adlaw it Sabado.
Suno kay Police Lieutenant Colonel Don Dicksie De Dios, hepe it Malay Municipal Police Station nga kapareho sa andang ginaeuman hay bumuhos ro numero it mga turista ag beachgoers sa isla it Boracay.
Rason nga mas ginpahugot pa nanda ro andang police visibility eabi eon sa andang deployment area.
Sa bulig sigon it municipal incident management team nga pilang adlaw antes ro nasambit nga kapistahan hay activated eon para masikyar ro kaeowasan it tanan nga pumueuyo ag bisita
Kamana man ro presensya it Coast Guard Boracay, Life Guard, Maritime Police, MAP, BFP Malay, MDRRMO Malay, Red Cross Malay-Boracay Chapter ag iba pang responders team hay naging masadya ag malinong ro bilog nga selebrasyon.
Sa pihak nga parte, may mga pilang ka mga insidente sigon sandang ginrespondehan apang owa it may kaangtanan sa kapistahan ni San Juan.
Sambilog sigon kara ro pagbuno-patay it daywang ka menor de edad nga suspek sa sangka 25-anyos nga eaeaking katutubong aeta.
Natabo sigon ro nasambit nga insidente sa sangka welcome ball sa Brgy.Nabaoy sa mainland Malay ko nagtaliwan nga Hunyo 22 it presenteng dag-on.
Ginpunto dugang ni De Dios nga bukon eamang sa Isla it Boracay nakatutok ro bilog nga pwersa it kapulisan sa baylo hay sa bilog nga banwa it Malay.
Sa makaron sigon hay nagapadayon ro assestment it DSWD Malay angot sa mga suspek ag nasambit nga kaso.
