KALIBO, Aklan–Nagpatuman it hugut nga pagbantay ro Malay Municipal Police Station kasunod it pag-umpisa it Love Boracay ko Abril 29 nga magabuhay hasta hin-aga, Mayo 1.
Ginpahayag ni Police Lieutenant Colonel Don Dicksie De Dios, hepe it Malay Municipal Police Station nga umpisa Abril 27 hay naka-full alert eon ro kapulisan para magtao it seguridad angot sa ginaeauman nga influx it mga turista.
Ginpasiguro man kara nga 24/7 nga aktibo ag naka-alerto ro mga kapulisan sa pagresponde engkaso nga makaangkon it emerhensiya.
Bangud sa pagbuhos it mga turista, haeos nagakaubusan eon ro mga pampasaherong saeakyan rason nga nagtanyag ro Malay PNP it libreng sakay.
Raya sigon hay masami nanda nga gina-ubra para makatao it serbisyo sa mga residente ag bakasyunista eabi eon kung bukon it masako ro andang police patrol.
Nauna eon nga ginpahayag it Malay Tourism Office nga may ginpahaum sanda nga nagkaeain-eain nga mga aktibidad para sa Labor Day nga ginaeakipan it Environmental activities kapareho it beach cleanup.
Sa pihak nga parte, mas pang ginpabaskog it Malay PNP ro andang pagbantay sa mga establisyemento sa isla it Boracay.
Raya hay matapos ro pagka-aresto sa daywang ka mga persona nga miyembro it salisi ag ipit gang nga tumandok it Negros ag Iloilo.//Suno kay De Dios nagpatuman sanda it hugut nga koordinasyon sa pamunuan it mga establisyemento para maabisuhan ro mga raya angot sa modus it mga kawatan.
