KALIBO, Aklan—Pormal eon nga nagpanaog bilang chief of police it Malay Municipal Police Station si PLt.Col. Don Dicksie De Dios kahapon, Hulyo 21.
Si De Dios nga pinakamabuhay nga nagserbing hepe it Malay PNP hay ginbuslan ni PLt.Col. Dainis Amuguis.
Sa anang naging diskurso, owa nana nalikawan nga maging emosyal samtang ginasaysay ro anang mga eksperyensya, hinimuan ag pagpasaeamat sa mainit nga pagbaton kana ag kumpiyansa nga gintao it Malaynon sa sueod it daywang dag-on ag limang buean nga pagserbisyo.
Ginpahayag it opisyal nga owa nana ginaeauman nga magabuhay imaw sa Malay bangud ro anang initial goal eamang hay ubrahon ro anang trabaho ag hueaton nga mabuoe ro promotion ag magbalik it Metro Manila.
Dugang pa kara nga owa naging madali ro anang trabaho para ipabilin ro disiplina sa anang mga tawuhan kamana man ro pagpasiguro it kaeuwasan, seguridad ag katawhayan sa mainland Malay ag isla it Boracay.
Samtang, kampante sigon imaw nga aywanan ro anang posisyon sa bag-ong Chief of Police ag kumpiyansa raya nga maipadayun ro kaayusan sa bilog nga banwa.
