KALIBO, Aklan–Ginakundina it “panlalawigang pederasyon ng mga SK ng Aklan” ro pag-apruba it daywang ka komitiba sa manaba nga kapueungan it kongreso ro pagtukod it Boracay Island Development Authority ukon Bida bill bilang kapareho it government-owned and -controlled corporation (GOCC) nga imaw ro magadumaea sa isla it Boracay ag barangay Caticlan.
Suno kay sangguniang kabataan ukon SK federation president it Malay Christine Hope Pagsuguiron nga ro nasambit nga substitute bill nga magatukod Bida hay sangka hayagan nga pagpakita it kawad-an it pagrespeto sa mga pumueuyu it banwa it Malay.
Makabig sigon raya nga pag-eabag sa local autonomy ag local government code of 1991 bangud nga gina take over kara ro executive ag legislative power.
Ro maka-alarma pa suno kana hay pwedeng ma-extend ro BIDA area kapareho it Buruanga ag Nabas bangud nga owa naka-specify ro sakop it andang lugar.
Bilang kapareho it korporasyon, ro magadesisyon kara hay mga board of directors kun sa siin posibleng maduea ro check and balance.
Madumduman nga gin aprubahan it committee on enterprises ag committee on privatization and on local government sa ginpatigayon nga hearing nanda ko Hunyo 15 kadungan it ika-72 nga Malay Day ro committee report angot sa substitute bill nga naga-consolidate sa 10 nga kapareho nga mga bills para sa pagtukod it Bida nga magapadaeagan sa isla agud nga masiguro ro padayun nga development.
Gindugang pa ni Pagsuguiron nga hugut sanda nga nagapamaeabag sa GOCC nga klase it pagdumaea nga ginaduso sa consolidated bill bangud nga bukon raya it para sa sustainability kundi sa money making sa patag it investment.
Mag-eowas sa pagbutang it mga streamers sa isla ag iba pang parte it probinsiya, aktibo man sanda sa social media ag iba pang forum agud nga kwestiyunon ro pagtukod it Bida bilang GOCC nga maga-gahum sa boracay sa sueod it 50 anyos.
Ro bida bill hay nakataeanang igapaidaeum sa deliberasyon sa plenaryo it kongreso sa pagbukas it sesyon.
