KALIBO, Aklan—Ginaeauman it Malay Tourism Office nga magataas pa ro numero it mga turistang magabisita sa isla it Boracay makaron nga buean it Pebrero.
Raya hay kasunod it selebrasyon it Valentine’s Day ag Chinese New Year.
Suno kay Malay Tourism Officer Mr. Felix Delos Santos, nag-abot sa 1, 960 ro mga turistang nagbisita sa Boracay rayang Pebrero 1 hasta 5.
Samtang, ko buean it Enero hay nakalista sanda it kapin sa 11,000 nga mga domestic tourist nga nagbakasyon sa isla.
Sa makaron suno kana hay nagapadayun ro pagtao it mga accredited hotels ag resorts sa Boracaya nga kapin sa 50 hasta 70 percent discounts sa andang accommodation.
May kaangtanan kara, bilang preparasyon sa pagbuhos it mga turista hay in place eon man ro mga protocols sa Caticlan Jetty Port ag Cagban Port.
Kamana man nga ro kada hotel hay may gintaeana nga safety officer para masigurong euwas ro mga bisita.
Sa pihak nga parte, naglunsar man ro Malay Tourism Office it 24/7 hotline may daywang dominggo eon ro nakataliwan.
Suno kay Delos Santos tuyo kara nga makaangkon it access pinaagi sa komunikasyon sa mga turistang nagasueod ag guwa sa Boracay.
Raya hay para magiyahan sanda ag masabat ro pilang mga pangutana.
