KALIBO, Aklan–Ginakabig it Malay Tourism Office nga welcome development ro paghaeuga sa mga restrictions agud nga makabakasyon sa isla it Boracay.
Suno kay Chief Tourism Operations Officer Felix delos Santos nga pinaagi kara hay mas pang maka-engganyo it mga turista mapa-lokal man ukon dumueuong nga magbisita sa pamosong isla.
Ginhalimbawa nana nga sa pihak it nag-agi nga bagyong paeng ko nagtaliwan nga domingo hay padayun ro pagtaas it tourist arrivals.
Raya sigon hay manami nga indikasyon para sa eowas ag dahan-dahang pagbangon it turismo sa isla.
Ko buean it Oktubre hay nagtaas ro mga numero it mga bisita it haeos 20% hasta 30% kumpara ko buean it Setyembre.
Nasayuran nga epektibo ko nagtaliwan nga Oktubre 29 hay ginbo-oe eon ro requirements nga QR code sa mga bakasyunista.
Mag-eowas kara, bukon eon it required ro pagsuksok it face mask nga paagto sa new normal.
Ro buean it Oktubre, Nobyembre ag Disyembre hay ginakabig nga super peak season sa Boracay.
Kaibahan sa mga nagadagsa sa isla sa makarondaya nga buean hay ro mga foreign tourists halin sa mga nasyon nga grabe ro kaeamig sa andang nasyon.
Nagapanguna gihapon ro korea sa mga dumueuong nga bisita nga ginsundan it US, Europe ag Germany.
Samtang, ginkalipay man nanda nga mag-eowas nga gina-obra nga vacation hub hay conference hub man makaron ro Boracay.
