Kalibo Aklan ——–Ginkalipay it Malay tourism office ro pagpabilin it probinsiya it Aklan sa General Community Quarantine (GCQ) ag owa eon ginpasaka ro quarantine qualifications sa mas mataas nga Modified Enhanced Community Quarantine (MECQ).
Suno kay Malay tourism officer Felix Delos Santos nga mabahoe ro posibilidad nga uman nga maapektuhan ro Isla it Boracay ag mapasara eon man sa oras nga ipaidaeum it National inter-agency task force ro Aklan sa MECQ .
Nauna eon nga ginrekomenda it gobyerno nga ibalik sa MECQ ro probinsiya , apang gin-apela raya ni Governor Florencio Miraflores.
Ginpahayag dugang ni Delos Santos nga may negatibo nga epekto sa Boracay kon uman nga makaangkon it closure eabi eon sa mga negosyante, trabahador ag mga residente nga amat amat eon kunta nga nakakabawi bangud sa pagbuhos it mga turista eabi eon ro naghalin sa national capital region ukon NCR .
Umpisa hulyo 1 hasta 12 hay naga abot eon sa 13,820 ro mga bisita .
Madumduman nga ko buean it Hunyo, ro tourist arrivals hay nag abot sa 26,354 makabig nga pinakamataas nga numero sa tiempo it pagpanaeasa it pandemya.
