Nakalista ro Malay Tourism Office it kabilugang 222, 952 tourist arrival sa isla it Boracay sa sueod it buean it Mayo.
Sa nasambit nga numero, 198, 534 ro domestic tourist; 1,794 ro overseas Filipino’s ag 22, 624 ro foreign tourist.
Suno kay Kathrine Licerio, tagapaghambae it Malay Tourism Office, kapin sa 22% nga mataas ro presenteng datos kon ikumpara sa kaparehong buean ko nagtaliwan nga dag-on nga nagaabot eamang sa masobra 180,000 ro tourist arrival sa mismong nasambit nga buean.
Angot kara, ginkalipay it taeatapan ro improvements bangud nga nagapakita eamang raya nga uwa nauulihi ro Boracay sa bucket list it mga turista.
Ginpahayag dugang ni Licerio nga padayon ro pagtinguha it andang taeatapan sa idaeom it suporta it lokal nga gobyerno it Malay nga magtambong sa mga international events agud nga consistent nga maipromote ro Boracay bukon eamang it sa mga domestic tourist kundi sa mismong mga dumueoong turista.
