KALIBO, Aklan—Bilang kaparte it 28th police community relations months celebration, nagpatigayon it libreng seminar ro Malinao municipal police may kaangtanan sa road safety sa covered court it banwa.
Ro seminar hay ginpangunahan it Technical Education And Skills Development Authority ukon TESDA ag sangka pribadong driving school.
Suno kay P/Capt Donie Magbanua, hepe it Malinao PNP station nga raya hay matapos nga mataeupangdan ro sunud-sunod nga aksidente sa daeanon.
Ro nasambit nga seminar hay kaeabanan nga ginpasakupan it mga drivers it 2 ag 3 wheeled vehicles kun sa siin sanda ro eaban nga eakot sa road accident.
Mag-eowas sa lectures hay nakaangkon man ro mga participants it kahigayunan nga makabo-oe it drivers license bangud sa certificate nga nabaton.
Dugang pa ni P/Capt Magbanua nga handum man nanda nga masueong ro mas eowas ag maayos nga mga karsada para sa tanan nga nagagamit kara.
Gusto man nanda nga makabulig agud nga mas pang mag abu ro makaangkon it bastanteng kasayuran sa pagmaneho sa tuyo nga malikawan ro mga aksidente sa daeanon.
Kaabuan suno kana nga naeaeakot sa mga aksidente makaron hay ro mga nagamaneho it motorsiklo.
