National News————-Ginreport it Food and Drugs Administration (FDA) ro mga “breakthrough COVID-19 infections” sa mga indibidwal sa pihak nga sanda hay mga nabakunahan apang raya hay maisto eamang nga numero ukon porsyento.
As of August 1, may unang 116 kaso it COVID infection sa mga indibidwal nga fully vaccinated kung siin 88% kara hay mild ag asymptomatic, 11% ro na-admit sa ospital ag may unang sambilog nga namatay.
Ginpakigbahin ni FDA director general Eric Domingo nga may mga indibidwal nga nagpositibo sa COVID-19 matapos nga mabakunahan it unang dose it vaccines nga una 546 cases samtang 61 man ro namatay.
Kapin sa 51 COVID-19 cases man ro nailista matapos nga maturukan it ikaywang dose ag daywa ro fatalities.
Samtang kapin sa 116 indibidwal man ro na-infect pa a gihapom it coronavirus matapos ro 14 nga adlaw umpisa nga mabakunhan it ikaywang dose ukon ginakabig nga fully vaccinated eun kung siin sambilog ro namatay.
Pagklaro ni Domingo, ro ginkamatay it mga nabakunahang indibidwal hay bangud sa COVID ag bukon it bangud sa bakuna.
Nakadepende man sigon sa lebel it reaksiyon it eawas it sangka indibidwal sa bakuna ag level it immunogenicity nga naga-generate it kaeawasan kung siin nakit-an nga kaabuan sa mga nagpositibong indibidwal nga naka-eksperyensiya it mild symptoms it COVID ukon asymptomatic.
Sa pihak kara, maisot eamang ro porsyento nga magpositibo sa COVID-19 nga una sa less than 1% it kabilugan nga 9 million nga fully vaccinated kontra coronavirus.
Pagklaro pa ni Usec. Domingo nga nakadepende sa porsyento it mga nabakunahan it partikular nga brand it COVID vaccines ro numero it mga nagapositibo kapareho it Sinovac ag Astrazeneca nga pinaka-dominant nga bakunang ginagamit sa vaccination program it nasyon.
Mas abanse man gihapon ro benepisyo it bakuna para malikawan ro severe cases ag death maghalin sa respiratory disease rason nga importante sigon nga makompleto ro bakuna.
Base sa pinakahuling datos hasta Agosto 1, kapin sa 11.7 million partially vaccinated ukon nakabatun it unang dose it COVID-19 vaccine samtang kapin man sa 9.1 million ro fully vaccinated sa nasyon.
