Nagataeang eon man ro mga pumueuyu maskin ro mga nagapatuman it laye sa sueundanan ukon mandato sa face mask.
Raya hay matapos nga magpaguwa it Executive Order si Cebu Gov. Gwen Garcia kun sa siin bukon eon it mandatory ro pagsuksok it face mask sa probinsiya partikular sa guwa ukon outdoor.
Magiging mandatory eon lang ro pagsuksok kara sa closed ukon airconditioned nga lugar.
Mandatory man raya sa mga may sintomas it COVID-19.
Owa man ginakilaea it Department of Interior and Local Government (DILG) ro nasambit nga polisiya it probinsiya.
Ginmanduan pa nanda ro PNP nga dakpon ro mga makitang owa nakasuksok it face mask.
Ginpahayag man it Department of Health (DOH) nga nagapabilin nga mandatory ro pagsuksok it face mask sa idaeum it sueundanan nga ginapatuman it IATF nga sakop ro mga local government units.
Samtang nagapanindugan man ro gobernador nga may gahum ro LGUs nga magpatuman it mandu sa andang mga nasakupan.
Maskin nga optional sigon ro owa pagsuksok kara, apang paalin kun pagadakpon man sanda.
May paeag man ro provincial government nga pagapasabton nanda ro mga pulis nga magapangdakop it owa nakasuksok it face mask.
Dikara eon man magataeang ro mga pumueuyu kon sin-o ro dapat nga magtau it pinal nga sabat angot kara .
Basta ro klaru kara maskin nga amat-amat eon nga nagabalik ro sitwasyon sa normal, apang owa pa eubusan nga naduea ro paeag it COVID.
Buot hambaeon nga una sa gihapon ro peligro nga uman nga magataas ro kaso kun eubusan nga magpabaya .
Indi dapat nga magmadali.
Dapat man nga sundon it tanan nga local government units ro parehong protocol pagd-abot sa pagsukoe sa pandemya ag indi magkanya-kanya.