KALIBO, Aklan — Hugut nga ginabantayan makaron it Philippine Coast Guard (PCG)-Aklan ro mandatory nga pagsuksok it life jackets sa tanan nga mga pasahero it motorbanca nga nagasueod ag nagaguwa sa isla it Boracay.
Suno kay PO3rd Michelle Baligo it PCG-Aklan nga raya eon ro andang patakaran antes pa man ro natabu nga trahedya sa kaeawran nga sakop it Iloilo ag Guimaras nga ginkamatay it 31 nga katawo .
Mag-eowas kara, kon maeain sigon ro tiempo hay ginapasugtan eamang nanda nga mag-eayag ro motorbanca sakay ro 75 porsiyento it total passenger capacity it saeakyang pandagat.
Samtang, ginapadumdum man nanda sa mga boat captain ag crew it mga motorbanca nga antes nga magbiyahe hay tan-awon anay kun may gale warning.
Ag kun mabahoe ro mga humbak ag mabaskog ro hangin ag uean hay ipaiway anay ro biyahe eabi pa ag kaabuan sa mga pasahero hay mga turista.
Gindugang pa ni PO3rd Baligo nga kada maeain ro tiempo ag mabaskog ro habagat, insigidang ginasaylo ro biyahe it mga motorbanca sa Tabon-Tambisaan port agud nga makalikaw sa mga mabahoe nga humbak sa nasidlangan nga parte it isla.
Nagapadayun man sigon ro andang pag-check ag pag-supervise sa palibot nga kaeawran it Boracay pinaagi sa pagpatigayon it seaborne patrol.
Haum sigon anuman nga oras ro andang mga floating assets kamana man ro pag-inspeksyon sa mga bagahe it mga pasahero gamit ro k-9 units sa Caticlan ag Cagban jetty port.
Hugut sigon nanda nga ginapatuman ro Memorandum Circular No. 02-13 angot sa pageayag it mga saeakyang pandagat kon maeain ro tiempo.
