KALIBO, Aklan—Ginaduso makarun ro mandatory nga pagsuksok it face mask ag face shield sa pampublikong lugar sa Barangay Poblacion sa banwa it Kalibo.
Base sa ginaproponer nga ordinansa ni Barangay Kagawad Mark Sy nga “Covid Protection Ordinance” magiging mandatory eun sa tanan nga mga pomoeuyo nga nagapadueong sa banwa it Kalibo ro pagsuksok it face shield.
Ginapahayag ni Sy nga nabilog ro proposisyon matapos nga magpagguwa it mandato ro Department of Transportation (DOTr) nga kinahangean magsuksok it face shield kung magsakay sa pampublikong transportasyon.
Apang owa sigon it klaro nga mando kung paalin ro maging set-up engkaso nga makapanaog eun sa ginasakyan.
Bangud ro banwa it Kalibo hay pinaka sentro it probinsya, ginbilog ro proposisyon nga dapat ro tanan nga mga pomoeuyo hay mandatory nga magsuksok it face shield, mag-euwas pa sa mandatory nga face mask.
Ginmarkahan man raya nga “urgent” ag kinahangean nga ma-aprubahan sa mas madaling tyempo bangud raya hay makabig sigon nga sambilog sa mga tikang agud nga malikawan ro padayun nga pagkalhit it coronavirus disease ukon COVID-19.
Sa unang pag-eabag hay magatao it warning ag sa second offense hay pagamultahan it P500.
Sa third offense man hay magabayad it P1,000.
Gin-engganyo man kara ro ibang mga opisyalis it kaeapit barangay nga engkasong maging ordinansa eun raya hay gamiton man sa andang tagsa ka mga lugar.
