KALIBO, Aklan—Nagpatuman it mas hugut nga polisiya ro lokal nga gobyerno it Banga kontra sa mga pasaway nga indibidwal nga owa nagasunod sa health and safety protocols.
Suno kay Banga Sangguniang Bayan member Jocel Rata nga nagpagguwa sanda it sangka ordinansa nga nagamando sa mga pumueoyong Banganhon nga magsuksok it face mask ag face shield eabi eon kun naga-adto sa mga pampublikong lugar.
Raya hay kasunod it gulpyadang pagtaas it kaso it Coronavirus Disease 2019 ukon COVID-19 eabi eon sa Banga Public Market.
Nasayuran nga temporaryong ginpasarado sa sueod it limang adlaw ro nasambit nga tindahan matapos nga daywang market vendor ro namatay bangud sa COVID-19 infection.
Nag-apela man ro opisyal sa mga pumueoyo nga magsunod sa ginapatuman nga ordinansa agud daeayon nga makontrol ro pagkalhit it deadly virus kamana man nga mapaeayo sa penalidad.
