Sa pihak it uman nga pagtinaas it kaso it COVID-19 sa bilog nga probinsya it Aklan hay nagapabilin nga bukon it mandatory ro pagsuksok it facemask.
Ginkumpirma ni Dr.Leslie Ann Sedillo, PHO II nga owa pa nagpaguwa it nagakaigong direktiba angot sa uman nga mandatoryong pagsuksok it facemask si Governor Joen Miraflores.
Nakaangkon eamang sigon it pagpueong ro gobernador kaibahan ro provincial IATF para sa nagakaigong tikang sa uman nga pagtinaas it kaso it nasambit nga virus.
Suno pa kana nga ro COVID-19 virus hay makabig nga kaparte eon sa pang adlaw-adlaw nga pagpangabuhi it tagsa ka indibidwal.
Malisod eon sigon rayang dueaon rason nga nakadepende eon lang sa tawo kun paanu raya malikawan.
Sa baylo sigon nga ibalik ro mandatoryong pagsuksok it facemask hay ginarekomenda eamang nanda raya sa publiko sandig man sa national guidelines.
Ginpahayag dugang nga ipabilin eamang sigon ro pagsunod sa mga minimum health standards ag magpabakuna para malikawan ro nasambit nga makataeapon nga masakit.
Ginarekomenda dugang sa mga vulnerable nga indibidwal eabi eon sa mga senior citizen nga magsuksok it facemask ag magpa booster shot.
Angot kara, sandig sa andang weekly bulletin, ginapahayag nga may unang 28 presenteng active nga kaso it COVID-19 sa bilog nga probinsya it Aklan.
