KALIBO, Aklan—Ginakabig nga welcome development it sangka retiradong PNP colonel ag presenteng provincial board member ro mandu ni Department of the Interior and Local Government ukon DILG Secretary Benhur Abalos nga ginapasumite it andang courtesy resignation ro mga heneral ag full colonel it Philippine National Police ukon PNP.
Ginpaathag ni Aklan first district board member Nemesio Neron nga tuyo kara nga maduso ro pagtinguha it gobyerno nga malimpyuhan ro linyada it kapulisan halin sa mga opisyal nga eakot sa illegal drug trade.
Dugang pa kara nga raya hay nagakahueugan nga masyado eon nga infected ro organisasyon it PNP.
Ginsuhestiyon pa kara nga bukon eamang sa mga matag-as nga opisyal magtutuk kundi nga kinahangean nga magpanaog ro pag-usisa sa mga staff sergeant ag master sergeant man.
Owa suno kana it dapat nga kabaeak-an ro mga miyembro it PNP nga bukon it eakot sa nasambit nga aktibidad.
Dugang pa kara nga may truth committee man nga magareview it resignasyon it mga police officers.
Samtang, nagapati si Neron nga kinahangean nga mapadayon ro imbestigasyon angot sa pagkaeakot it mga mataas nga opisyal it PNP sa nasambit nga iligal nga aktibidad.
Madumduman nga nauna eon nga ginpahayag ni DILG Sec. Benhur Abalos nga pilang buean man nanda nga gintun-an ro isyu sa illegal drugs sa nasyon ag nagtuhaw nga may mga eakot nga police colonels ag police generals kara.
