KALIBO, Aklan–Matapos ro haeos daywang dag-on, uman eon nga pagabuksan sa publiko ro Manduyog Hill nga sambilog sa ginadagsa it mga pumueoyo para magpamaeandong ag magpangamuyo kada Semana Santa.
Ginpahayag ni Michael Ibisate, Campus Director it Aklan State University (ASU) nga naglunsar sanda it security plan bangud sa ginaeauman nga pagbuhos it maabu nga mga tawo.
Suno kay Ibisate, one way ro andang igapatuman umpisa Abril 14 hasta 15 para maging tayuyon ro pagsueod it mga tawo.
Halin sigon sa entrance hasta sa ibabaw it Manduyog Hill hay may mga ginplastar sanda nga improvised signages bilang sueondanan it mga pumueoyo.
Pila sigon sa andang mga ginabawae hay ro pagsueod it mga indibidwal nga una sa idaeom it makahieilong nga ilimnon, pagbaligya it Ukay-ukay ukon owa nagakaigo nga pagkaon ag pagdaea it mga alagang kasapatan.
Samtang, owa sigon it gintaeana nga misa sa nasambit nga lugar kundi Via Crucis eamang ro paga-eauman.
Nag-apela man raya sa publiko nga padayun nga magsunod sa health and safety protocols partikular ro pagsuksok it face mask ag social distancing para mapabilin nga euwas ro kada isaea.
