KALIBO, Aklan—Padayon nga ginausoy it mga otoridad ro sangka mangingisda nga naduea matapos nga nag-eayag bandang alas-6:00 it gabi-e ko adlaw it Sabado sa Buruanga, Aklan.
Suno kay Jose Tandog, manghod it mangingisdang si Panfilo Tandog Jr., 52, residente it Brgy. Katipunan sa nasambitang banwa nga posibleng kumueob ro bangkang de motor it anang manghod bangud sa mabahoe nga sting ray ukon pagi nga nagbalimbod sa eubid it makina it bangka.
Insigidang ginreport sa MDRRMO-Buruanga ro impormasyon kat uwa naka-uli ro mangingisda pagkaagahon.
Nagbulig sa rescue operation ro Bantay Dagat ag Philippine Coast Guard, apang uwa pa raya nakit-an hasta sa makaron.
Nakita ro nakakueob nga bangka sa tunga it eawod apang uwa eon ro nasambitang mangingisda.
Nasapwan man sa lugar ro mabahoe nga pagi nga ginatantyang sarang nga makahunos it limang bangka nga nakabalimbod pa sa eubid nga ko ulihi hay andang ginbuhian.
Ro mangingisda hay nakasuksok it jacket nga itom, naka-saewae, maputi ag mga 5’7” ro kataason.
