KALIBO, Aklan–Ginapatihan nga inatake it anang gina-angkon nga sakit ro nakit-an nga mangingisda nga owa eon it kabuhi sa bibi it baybay nga sakop it Sitio Lagatic, barangay Poblacion sa banwa it New Washington.
Nakilaea ro biktimang si Rolando Montano, Sr., 69 anyos ag residente it Sitio Dumlog sa nasambit nga lugar.
Nakita raya nga nagakueob ag gindagsa maeapit sa pantalan it mga katapo it Bantay Bayan, kun sa siin, ginadudahan nga naeumos matapos nga atakehon it anang sakit.
Suno sa unga it biktima nga si renalyn montano, nag-uli imaw sa aklan halin sa manila agud nga ipabueong ro sakit it anang ama nga alta presyon ag tuberculosis.
Ro biktima hay may pitong unga.
Samtang, ginpahayag ni Arbil Asis, gumankon it biktima nga owa eon naka-uli kabi-e ro anang tiyo rason nga nagkabaeaka sanda sa pagduda nga may maeain nga natabu kana.
Bandang alas-5 kahapon it hapon kat mag-ea-ong ro biktima sa anang mga unga nga maga-agto sa anang baroto agud nga mag-limas ukon magsag-a it tubi, apang pasado alas-8 hay owa gihapon raya naka-uli rason nga nagdesisyon nga andang paga-usuyon.
Kat owa nakita, ginpakamayad nanda nga pagka-aga eon lang raya usuyon.
Sa pihak nga parte , gina-usisa pa sigon ro nakitang nina sa leog it biktima.
Ro insidente hay padayun nga gina-imbestigahan it New Washington PNP ag SOCO.
