KALIBO, Aklan—Owa it nakikitang foul play ro pamilya base sa mga inisyal nga ebidensyang nabo-oe it mga otoridad angot sa pagkamatay it 45-anyos nga mangingisda nga nauna eon nga napabalita nga missing sa Brgy. Songcolan, Batan.
Raya ro ginpahayag ni Reniel Feliciano it Municipal Disaster Risk Reduction Management Office ukon MDRRMO Batan ag igbata man it biktimang si Ramil Eleserio ag residente it nasambit nga lugar.
Bandang alas-9:00 it agahon hay nasapwan nga owa eon it kabuhi ro biktima nga nagapaeutaw-eutaw sa kaeawran nga sakop it Brgy. Dumaguit, New Washington.
Matapos nga gin-report nga missing, insigidang nagpatigayon it search and rescue operation ro gintingub nga pwersa it Philippine Coast Guard ukon PCG sub-station Dumaguit, PCG-Caticlan, MDRRMO-Batan ag New Washington, Batan Municipal Police Station ag maritime police.
Apang bangkay eon nga nasapwan si Eleserio it mga operator it ferry boat sa lugar.
Nasayuran nga bandang ala-1:00 it aga-aga it Lunes kat nagpa-eawod ro biktima sakay it anang baroto , apang napas-eawan nga maka-uli sa nakasanayan nga oras rason nga naalarma ro anang pamilya.
Ko ulihi hay nakita ro anang ginsakyan nga baroto sa parte it Barangay Ochando, New Washington nga hanang-it sa “taba” apang owa eon it sakay nga tawo ag naga-andar ro anang makina.
Ginapatihan nga aksidente raya nga nahueog sa anang baroto nga naging rason it anang pagka-eumos.
Sa makaron hay nagapadayun ro imbestigasyon it kapulisan sa insidente.
