KALIBO, AKLAN— Tumugpa sa ospital ro sangka mangunguma matapos nga gin-eabo sa Brgy. Agmailig, Libacao bandang alas-9:00 ro kagab-ihon.
Nakaangkon it limang lastro partikular sa ueo, uyahon, abaga, butkon ag siki ro biktimang si Joel Tagpuno, 29-anyos matapos nga gin-eabo it suspek nga ginkilaea kay Jomarie Beltran, sa legal nga edad ag parehong residente it nasambitang lugar.
Base sa panaysayon ku misis ni Tagpuno, ginsukot sigon kara ro suspek it andang gintrabahuan partikular ro andang ginturtulan sa eanas apang naghinyo ro suspek nga uwa kanda it inugbayad kon siin nagpaiway man ro biktima.
Sa pihak kara, samtang naga-inuman ro magtimbang nga parte hay nagguwa ro istorya may kaangtanan sa andang pagturtle sa eanas hasta nga sa pag-uli ni Tagpuno hay gin-eambangan sigon imaw ni Beltran kadungan ko pag-eabo kana it makapilang beses.
Nakadaeagan pa ro biktima ag nakapangayo it bulig sa anang pamilya.
May kaangtanan kara, insigidang gindaea sa aklan provincial hospital si Tagpuno kon siin raya sa makaron padayon nga ginabueong.
Samtang si Beltran, matapos ro insidente hay insigida man raya nga nagpaeagyo.
Ro insidente hay presente sa makaron nga ginaimbestigahan it Libacao PNP para sa nagakaigong disposisyon.
