KALIBO, Aklan—Nakataeana eon mga magabaton it P3,000 fuel subsidy ro kapin sa 389 nga mga mangunguma it mais sa bilog nga Western Visayas.
Suno kay James Earl Ogates, tagapaghambae it Department of Agriculture (DA) region 6 nga ro nasambit nga mga beneficiaries hay pwede eon nga makabo-oe it andang subsidiya.
Tuyo kara nga mapahagan-hagan ro kalisod it mga corn farmers nga nagagamit it makinarya bangud sa padayun nga pagtaas sa presyo it langis.
Raya hay pinaagi sa cash card halin sa Development Bank of the Philippines nga igapakita sa mga gasolinahan nga accredited it Department of Energy.
Sa kabilugan nga 3,222 nga corn farmers, haeos 829 pa eamang ro pre-qualified beneficiaries sa bilog nga region 6 base sa ginpatigayon nga validation.
Sa nasambit nga numero, 633 ro natigayon eon nga na-endorso sa central office para sa dugang nga verification.
Sa makaron hay 389 eon ro naaprubahan kun sa siin naeakip kara ro mga corn farmers halin sa Aklan.
Ginaeauman nga sa Mayo 25 hay makapatigayon eon sanda it ceremonial distribution it cash card.
Ro Aklan hay may kabilugan nga 512 nga mga benepisyaryo.
Ro tanan sigon nga mga beneficiaries hay nakalista sa registry system for basic sector in agriculture.
Nakaangkon suno kana it delay sa distribution bangud sa bagyong agaton nga nagpabuhay sa andang validation.
