KALIBO, Aklan—Ginakabaeak-an makaron it mga manug-sibuyas sa Occidental Mindoro nga kapin pa sanda nga maeobog sa utang sa oras nga umabot ro haeos 4,000 metric tons nga gin-import nga puti ag puea nga sibuyas it Department of Agriculture.
Suno kay Marco Tadeo, sangka mangunguma it sibuyas sa Sablayan, Occidental Mindoro nga sa unang dominggo it buean it Marso hay magaumpisa eon ro anihan it sibuyas sa andang lugar rason nga magaabo eon ro supply nga bastante pa sa kinahang-eanon it tanan.
Aminado imaw nga sa makaron hay P80 pesos kada kilo ro farm gate price bangud sa uwa pa nagaumpisa ro anihan apang kon tyempo eon it anihan hay nagaabot eon lang sa P15-P20 pesos ro kada kilo it farm gate price.
Ro importasyon ro nagapatay sa andang pangabuhian bangud sa ginatan-aw nga magkaeasamad eon man raya sa oras nga gumuwa sa merkado ro mga imported nga sibuyas.
Ginpahayag dugang ni Tadeo nga uwa pa sanda nakabawi ko tyempo nga inatake it peste ro andang mga pananom nga hasta sa makaron hay uwa pa nakabalik ro andang kapital ag may utang pa.
Literal nga makataeangis suno kana ro andang sitwasyon bangud sa mga naging desisyon ag plano it Department of Agriculture.
