KALIBO, Aklan—Ginakabig nga positibo ag mabahoe nga kasoehayan para sa mga unconsolidated drivers and operators nga miyembro it grupong Manibela sa syudad it Bacolod ro pagrepaso sa kontrobersyal nga jeepney modernization program kasunod it pagkriar ni Department of Transportation (DOTr) Secretary Vince Dizon it sangka komite nga magakonsulta sa tanan nga stakeholders agud matumod ro andang mga ginakabaeak-an sa programa.
Suno kay Bacolod Manibela president Rudy Agsam Catedral, pinaagi sa nasambit nga tikang hay mataw-an it katumanan ro andang katuyuan nga himuon nga tama, makaturangan, ag makatawo ro programa nga eubus nga nakaapekto sa andang pangabuhian.
Ginpahayag dugang kara nga uwa sanda nagapamaeabag sa kon anuman ro programa it gobyerno kaibahan eon ro pagsa-moderno it public transport apang kinahang-ean nga maging mapinuslanon raya para sa tanan ag bukon it magapalugmok kanda nga mga kubos.
Nasayuran nga ro komite hay ginabilog it mga opisyal it Road Transport Sector it Department of Transportation, Land Transportation Office Chief Vigor Mendoza, ag bag-ong tukod nga Office of Transportation Cooperatives nga si Mon Ilagan.
Sa pihak kara, nagasalig sanda sa bag-ong special committee nga magakonsulta sa transportation ag commuters groups, private sectors, local government units ag iba pang concerned stakeholders agud makabilog it komprehensibong solusyon sa sitwasyon it programa.
