Sangka eaeaki sa United Kingdom ro nagapabayad it £5 million ukon katumbas it P371.68 million sa tech giant nga Apple matapos gin-akusahan nana raya nga nagbulgar it anang pribado nga mensahe sa ibang mga babaye sa anang asawa pinaagi sa pag-synchronize it anang iPhone sa iMac.
Sa sueod it haeos sang dag-on nanda nga pag-iba bilang mag-asawa, ginasugid nga si mister hay nagabo-oe it serbisyo it mga sex workers nga anang gina-contact pinaagi sa anang personal nga iPhone.
Agud nga indi mabuking, naging madahan imaw sa anang pag-delete sa mga mensahe sa anang cellphone apang aminado imaw nga owa nakasayod nga posible pa gale nga makita ro anang mga mensahe sa nagkaeain-eain nga platforms kun mag-log in gamit ro pareho nga account.
Sang adlaw, nag-log in ro anang misis sa kapareho nga family account sa iMac ag anang nadiskubrehan ro mga spicy messages sa tunga it anang mister ag maabu nga mga babayi.
Bangud kara, nagpakigbueag ro anang asawa daea ro masobra sa P3.3 billion nanda nga kwarta.
Ginbasoe nana ro giant tech sa tanan nga natabu ag gusto nana nga bayaran imaw it nasambit nga kompaniya.
Suno sa eaeaki nga kunta kon ginahambae nga deleted eon ro mga messages hay dapat nga indi eon raya makita pa it uman.
Sa makaron gusto it mister nga balikan imaw it anang mga ginbayad sa anang asawa sa andang pagbueag kamana man ro mga legal fees.
