KALIBO, Aklan — Mag-eowas sa kasong acts of lasciviousness, nagaangatubang man sa kasong pag-eabag sa Omnibus Election Code ro sangka nagpakilaeang asset sigon it Philippine Army matapos nga manghulikap sa kaparehong pasahero hay naboe-an pa it baril sa Brgy. Aquino, Ibajay, Aklan.
Ro suspek nga ginkilaeang si Jay Tilos, 48, tubong Tigbauan, Iloilo ag presenteng naga-istar sa Barangay Balusbos, Malay, Aklan hay nakakulong makaron sa Aklan Rehabilitation Center.
Suno sa reklamo it 20-anyos nga biktima nga gintago sa pangaeang Elsa, samtang nagapauli sa Antique halin sa Kalibo sakay it sangka pampasaherong van hay nakatueog sigon imaw sa biyahe.
Kat gulpi eon lang kara nga nabatyagan nga may nagahulikap sa anang hita hasta sa maselang parte it eawas.
Napasinggit ag nagatangis imaw nga ginpapundo ro saeakyan, apang gulping naalarma ag nag-eompat ro eaeaki sa van antes nga nagpaeagyo.
Nadakpan raya it mga barangay tanod kat magpanago sa barangay hall ag naboe-an it .45 kalibre nga baril nga uwa it nagakaigong papeles.
