Mas pang ginapabaskog it municipal agriculture’s office (MAO-Kalibo) ro andang Pest Surveillance and Management Activities agud nga mabaeabagan ro pagkalhit ag pag-abu it peste nga fall armyworm sa banwa it Kalibo.
Suno kay Uriel Las Piñas, OIC it MAO-Kalibo nga base sa andang pag-usisa nagapanaeasa eon ro nasambit nga makahaealit nga ueod sa haeos 50 porsiyento it mga pananum partikular sa kamaisan it Mobo, Tinigao, Linabuan Norte, Estancia ag iba pa.
Pinaagi suno kana sa pag-monitor sa presensiya it mga peste hay matigayon raya nga matapna.
May gintau man sigon nga pesticide ro Department of Agriculture (DA) Regional Office, apang ro pag-spray hay dapat nga dueueungan ag sa gabi-i obrahon bangud nga kaeabanan sanda nga nagaguwa sa raya nga mga oras .
Nasayuran nga ro fall armyworm hay nataeupangdan sa nasyon ko hunyo 2019 ag umatake sa probinsiya it Aklan ko Disyembre 2019 pagkatapos it pagpanaeasa it Bagyong Ursula.
Ginklaru man it opisyal nga magka-iba ro armyworm nga naga-atake sa mais ag sa paeay.
Si Las Piñas ag iba pang opisyal it MAO Kalibo hay nakataeanang maga-atubang sa session it Sangguniang Bayan (SB) sa lunes nga adlaw agud nga iplastar ro mga tikang nga andang ginahimo agud nga malikawan ro pag-abu it peste sa mga pananum nga mais nga paborito nanda nga gina-istaran.
