KALIBO, Aklan–Naglunsar ro Kalibo Municipal Agriculturist Office it house-to-house rabies vaccination bilang partisipasyon sa Rabies Awareness Month sa Brgy. Tigayon, Kalibo ko Marso 25.
Suno kay Municipal Agriculturist Officer Uriel Las Piñas nga naga-abot sa 140 ka mga ayam ro andang nabakunahan sa ginlunsar nga programa.
Bangud nga owa pa nag-abot ro andang anti-rabies vaccine, nagdesidir sigon ro andang opisina nga magbakae it kaugalingon nga bakuna.
Suno kana, nag-abot eon kahapon ro inisyal nga delivery nga 140 vials.
Ginpaathag ni Las Piñas nga nagtaeana ro MAO it P222,600 nga pondo para sa kabilugan nga 420 vials.
Raya sigon hay bastante para sa 70 hasta 80 porsyento it populasyon it mga ayam ag kuring sa banwa it Kalibo.
Ginaeauman nga maga-resume ro andang anti-rabies vaccination sa masunod nga dominggo nga magabuhay hasta Setyembre 2022.
