KALIBO, Aklan–Nagsumite eon it masterlist ro Municipal Agriculture Office (MAO)-Kalibo sa Department of Agriculture para matumod ro mga corn farmer ag fisherfolk nga pagataw-an it fuel subsidy.
Raya hay kaparte it programa it gobyerno para sa agriculture sector nga sambilog sa eubos nga naapektuhan it sigidas nga pagtinaas it presyo it pretrolyo.
Suno kay Municipal Agricultural Officer Uriel Las Piñas, kinahang-ean nga miyembro it sangka asosasyon ag naka-enroll sa Registry System for Basic Sectors in Agriculture (RSBSA) ro mga corn farmer ag mangingisda nga gustong mag-avail it subsidiya.
Sa makaron hay owa pa sigon sanda it nabaton nga ‘go signal’ kung hin-uno paga-umpisahan ro pagtao it ayuda.
Ginpasiguro man kara nga insigida sandang magapagguwa it anunsyo engkaso nga makabaton sanda it dugang nga impormasyon angot kara.
