Sangka Australian ultramarathon runner ro ginbawian it medalya ag trophy matapos masayuran it organizers it marathon nga nagsakay raya sa kotse sa pilang parte it 50-mile race nga anang gin intrahan.
Nagtapos sa ikatlong puwesto ro 47-anyos nga si Joasia Zakrzewski sa 2023 GB Ultras 50-mile race nga ginpatigayon sa England ko Abril 7.
Nag-pose ag nagahibayag nga ginbaton ni Zakrzewski ro medalya ag trophy maskin nga nasayuran nana nga ro anang nadag-an nga 3rd place hay pinaagi sa pagpangdaya.
Pagkatapos it kompetisyon, nataeupangdan it race organizers nga may makadueuda sa GPX data ni Zakrzewski bangud nga nag abot sa 35mph ro anang kadasig sa matag-od nga parte it karera
Nagduda ro organizers bangud nga ro pinakamadasig nga tawo sa bilog nga kalibutan nga si Usain Bolt eamang ro may ikasarang nga obrahon ro makarondaya kadasig nga pagdaeagan.
Sa ginpatigayon nga interrogation it organizers sa race staff ag mga nakatan-aw sa race, nasayuran nga sumakay si Zakrzewski it kotse ag ginamit nana raya agud nga makaabante sa karera it 2.5 miles.
Matapos raya hay insigidang ginbawi ro bronze medal ag trophy kay Zakrzewski.
Suno kay Zakrzewski, nagdahilan imaw nga samtang sa katung-anan it karera, nagsakit ro anang siki ag ginsakay imaw it anang amigo sa anang kotse agud nga ihatud sa race checkpoint.
Pag-abot sa checkpoint agud nga ipahisayod nga indi eon nana pagapadayunon ro karera, ginkumbinsi imaw it mga staff nga padayunon pa ro marathon bangud nga kanugon man ro anang pagbiyahe sa England halin sa Australia.
Mag-eowas kara, gin aku ni Zakrzewski nga saea ro pagbaton nana sa medalya ag trophy ag nagtau raya it public apology.
Ginpamalibaran it mga staff it marathon nga ginkumbinsi ag ginpasugtan nanda si Zakrzewski nga padayunon ro pagdaeagan sa karera.// sa makaron, may pila nga mga nagapetisyon nga papanaugan it lifetime ban sa mga marathon si Zakrzewski.
