Ginkumpirma ni dating brgy. kagawad Mark Sy nga imaw hay pormal eon nga nagresigned bilang brgy. kagawad it Poblacion Kalibo.
Imaw hay magapanerbisyo eon sa gobyerno local it Kalibo bilang Head it Barangay Affairs.
Suno kana nga makasueubo man ro anang naging desisyon apang sambilog sigon raya sa pamaagi para makaserbisyo pa sa mas maabong Kalibonhon.
Ginpaathag ni Mark Sy nga umpisa nga nagdaog bilang Alkalde si Kalibo Mayor Juris Sucro hay natunga man ro ana nga obligasyon rason nga naapektohan ro anang pagserbisyo ukon performance sa Brgy. Poblacion.
Sa pihak kara, bukon sigon raya it rason para maapektohan man ro anang pagbulig sa pagpatigayon it mga programa sa bilog nga banwa it Kalibo.
Rason nga nagdesider eon lang imaw nga magpanaog sa pwesto para mas matutukan ro pagpaabot it bulig sa mas maeapnagon nga pamaagi.
Angot kara, haom ag bukas sigon ro anang opisina para magbulig sa tanan nga pumueuyo mapakontra partido man ukon kaalyado.
Sa makaron, bukas ro posisyon nga ginbakante ni dating Brgy. Kagawad Mark Sy para sa mga interisado nga magpanerbisyo sa Brgy. Poblacion.
Magpasa eamang sigon it letter of intent ag base sa laye, pagabotohan it konseho ro sin-o man nga igabueos nga kagawad halin sa mga nag apply sa nasambit nga posisyon
