KALIBO, Aklan—Nagapamaeabag ro Market Supervisor it Kalibo Public Market sa ginaproponer it pilang miyembro it Sangguniang Bayan it Kalibo nga obrahon nga relocation site it mga vendors ro Toting Reyes St., Kalibo sa oras nga umpisahan eon ro construction it bag-ong building.
Suno kay Market Supervisor Abel Policarpio nga importante nga taw-an it konsiderasyon ro seguridad, peace and order, sanitasyon ag ikamayad nga eawas it parehong mga vendors ag mga bumaeakae.
Masyado man sigon nga gutok ro lugar para sa kapin sa 949 nga mga stall owners.
Mag-eowas kara, ro nasambit nga plano suno kana hay sangka pag-eabag sa laye.
Ko 2005 sigon hay naging kontrobersiyal ro pagdihon it kalibo vendors association ag transport group it petisyon sa Sangguniang Panlalawigan nga ginabawae ro pagpatigayon it market day sa nasambit nga kalye kada miyerkules ag domingo nga adlaw bangud nga nagatuga it disturbo sa daeagan it trapiko eabi pa ag baeaha-on ro nasambit nga lugar.
Indi man sigon madali-dali ro construction it bag-ong building bangud nga posible raya nga abuton it daywa hasta tatlong dag-on.
Sa pihak nga parte, mas maabu man sigon nga stall owners ro bukon it pabor sa nasambit nga plano bangud nga mag eowas nga light materials ro ginagamit hay maisot pa ro espasyo nga kapin sa 2-meters eamang.
Nasayuran nga base sa petisyon it majority it SB members sa Provincial board, planong ipasarado ro halin sa kanto it roxas avenue hasta sa kanto man it F. Quimpo St. agud nga magamit ro kahabaon it Toting Reyes St., Kalibo.
Gina-insister nanda nga disbentaha sa LGU-Kalibo ro pagbakae it eugta sa judge martelino st sa barangay andagao nga pagapatindugan kunta it 3-storey nga multi-purpose building agud nga obrahon nga relocation site bangud nga masyado sigon nga mahae ro anang presyo.
Sa ginpatigayon nga special session, majority it mga SB members hay pabor sa pag amyenda sa P60.876 million pesos nga pondo para sa pagbakae kunta it eugta ag itaeana eon lang raya sa pagbutang it bag-ong primary hospital sa Kalibo.
Ro proyekto hay kaparte it P691.322-million pesos nga gin utang it LGU sa banko.
