Ginhalin eun si Mary Jane Veloso sa sangka regular dorm it Reception and Diagnostic Center (RDC) sa Correctional Institution for Women (CIW) matapos ro 5 adlaw nga quarantine period.
Suno sa Bureau of Corrections (BuCor), magapabilin idto si Veloso sa sueod it 5 adlaw.
Base man kay CIW acting superintendent Marjorie Ann Sanidad, makaibahan ni Veloso idto ro 30 bag-ong persons deprived of liberty (PDLs).
Magapaidaeom si Veloso sa mandatory orientation, diagnostics ag classification.
Samtang ginsugo eun ni BuCor Director General Gregorio Catapang ro paghalin it mga rekord ni halin sa Indonesia.
Importante sigon ro paghalin ngara para sa ahensiya bangud magatao raya it daeaon para ma-assess kun opisyal nga kilaeanhon ro magsobra 14 dag-on nga pagkakulong ni Veloso sa Indonesia bilang valid prison time sa idaeom it andang hurisdiksiyon.
Matandaan nga nag-apela si Veloso ag anang pamilya sa paagi it pagtipon it signature campaign para ipanawagan kay Pangueong Ferdinand Marcos Jr. ro paggawad kana it executive clemency para kay Mary Jane.
Apang sa bahin man it Pangueo, nauna nana nga ginhambae nga ginasalig nana ro pagdesisyon sa mahimong clemency kay Veloso sa mga legal expert it gobyerno.
Samtang, sa bahin man it Indonesia kun siin ngadekadang nakulong si Veloso, pahayag kara nga andang pagarespetuhon ro anuman nga desisyon it Pilipinas kaibahan ro pagtao it clemency kay Veloso.
