KALIBO, Aklan—Mas eowas ro version it Malay Municipal Police Station sa andang pagpatigayon it Barangayanihan ukon community pantry kabulig ro mga stakeholders sa isla it Boracay.
Suno kay Lt. Col. Don Dicksie De Dios, hepe it Malay Police Station nga antes nga mag distribute it mga goods hay naga-isyu sanda it stub sa andang mga target recipients agud nga malikawan ro pagdagsa it mga tawo sa lugar agud nga magbo-oe it andang mga kinahangeanon sa sang adlaw.
Tuyo kara suno kay De Dios nga ro andang barangayanihan hay makasunod sa ginapatuman nga health protocols para sa kaeowasan it tanan.
Suno kana nga ro andang partner nga mga stakeholders ro nagatumod it target nga lugar nga andang pagapatigayunan it community pantry bangud nga sanda ro nakasayod it lugar ag ro mga tawo nga eubus nga nagakinahangean it bulig.
Naga-dere-deretso sigon ro andang community pantry nga nag umpisa kato pang Abril 22.
Kaibahan sa andang mga ginatau hay bugas, tinuea ag iba pang mga items.
