KALIBO, Aklan—Gin-inagurahan it Department of Transportation (DOTr) ag Civil Aviation Authority of the Philippines (CAAP) ro mas ginpabahoe nga Passenger Terminal Building (PTB) it Kalibo International Airport.
Suno kay DOTr Secretary Arthur Tugade, importante ro pagkakumpleto it proyekto para sa sambilog sa pinaka-masako nga paeuparan sa nasyon bilang gateway paagto sa isla it Boracay, sambilog sa mga ginadayo nga tourist destination sa bilog nga kalibutan.
Kadungan it ginpatigayon nga seremonya, agahon it Biyernes, Hunyo 4 hay senyales man raya it pag-umpisa it operasyon it bag-ong terminal building.
Ginpangunahan ni Secretary Tugade ro seremonya, kaibahan ro iba pang opisyal it gobyerno.
Gintukod sigon ro bag-ong PTB agud nga madugangan ro passenger capacity it paeuparan ag agud nga makatau it mas komportableng air travel.
Mabahoe nga bulig sigon raya sa mas pang pag-umwad it Aklan ag bilog nga Western Visayas.
Sa bulig it bag-ong terminal building, makasarang ro KIA nga makapag-accommodate it mas maabu pang pasahero eabi eon kon peak hours.
Makaron nga tapos eon suno kana ro expansion ag extension works it airport, halin sa dating 1,584 sq. meters nga area, makaron hay nag-eapad eon sa 2,633 sq. meters ro International Terminal Building it KIA.
Bangud kara, nagbahoe eon ro covered exterior lobby para sa mga pasaherong nagapila sa guwa it terminal.
Mabahoe eon man ro pre-departure area, kun sa siin makaangkon eon it komportableng pagpungko ag paghueat ro mga pasahero nga naga abanga it andang mga flight.
Nag-eapad man ro espasyo para sa Customs, Immigration ag Pre-Screening it mga pasahero kamana man sa airline check-in counters nga makabulig sa pag-cater it mas maabu nga biyahero.
Sa pihak nga parte, ginpabugae pa ni tugade nga masobra sa 200 nga trabaho sa aklan ro nahimo sa ginpatigayon nga expansion project it airport sa tunga it covid 19 pandemic.
Mag-eowas kara, 316 man ro presenteng nagatrabaho eon sa paeuparan.
Sa pihak nga parte, ginpasaeamatan man ni Aklan Governor Florencio Miraflores ro Department of Transportation (DOTr) sa pagtinguha nga matapos ro renovation ag pag-upgarde it Kalibo International Airport.
Nakita sigon kara ro mabahoe nga pinagbag-o it paeuparan halin sa pagiging secondary airport hasta sa kun ano eon raya sa makaron.
