Kalibo Aklan ———Kasunod it pagtaas it kaso it COVID-19 sa bilog nga probinsiya it Aklan, nagpatuman umpisa makaron nga adlaw it martes it mas hugut nga health protocol.
Suno kay Ibajay Mayor ag League of the Municipalities of the Philippines (LMP)-Aklan Chapter President Jo-en Miraflores raya ro andang ginkasugtan sa ginpatigayon nga pueong it Aklan Inter-Agency Task Force against COVID19 nga ginpangunahan ni Governor Florencio Miraflores.
Sa ginpaguwa nga Executive Order it Gobernador, epektibo makaron nga adlaw, Hunyo 8, 2021, uman nga nagpatuman it mga checkpoints sa kada banwa.
Ginasigurado it mga nakabantay nga mga pulis ag opisyal it Barangay nga kumpleto ro mga requirements it mga biyahero kun sa siin ro mga essential travellers eamang kapareho it mga medical workers, APORs ukon mga nagatrabaho ro ginapasugtan nga makaguwa .
Ginpahayag pa ni Mayor Miraflores nga ginamanduan ro tanan nga mga pumueuyu nga magpabilin anay sa sueod it andang baeay sa sueod it daywang domingo umpisa hin-aga nga adlaw it miyerkules agud nga masiguro ro andang kaeowasan kontra sa CoViD-19.
Bawae man sigon ro mga naga-edad it 15 anyos panaba ag 60 anyos pataas nga makatabok sa pihak nga banwa mag-eowas kon sanda hay ginakabig nga mga essential workers ukon service provider .
Kinahangean nga makapakita sanda it company ID ag travel pass nga iga-isyu it andang natungdan nga mga Local Government Units (LGUs).
Mag-eowas sa instriktong pagpatuman it curfew hour umpisa alas-9 it gabi-i hasta alas-4 it aga-aga hay magapatuman man it liquor ban .
Bangud sa maka-alarma nga sitwasyun , naga apela imaw sa mga pumueuyu nga magkooperar ag suportahan ro mga ginapatuman nga health protocol ag guidelines .
Ro Aklan hay presenteng nakapaidaeum sa Modified General Community Quarantine (MGCQ).
Sa makaron hay humampak eon sa 2,709 ro numero it COVID-19 cases sa Aklan.
Sa nasambit nga numero, 467 ro active cases samtang 64 ro namatay.
