Sa pihak it pagbukas it mga mall ag iba pang baealigyaan, mataeupangdan nga mas nga nag abu pa ro mga nagasakdag sa sa online shopping.
Medyu mas nagiging komportable ro kaabuan sa pagbakae online bangud nga mag-eowas nga nakatipid sa oras hay nakalikaw pa sa trapik.
Suno sa sangka pagtuon, may una nga 79 porsyento it mga ginikanan ro naghambae nga mas gusto nanda ro online shopping.
Samtang pito sa 10 nga shoppers ro nakadiskubre ag nagbakae eon man sa mga social media platforms.
Nagtaas man ro numero it mga Pinoy nga nagasakdag sa mga online sales kumpara kato antes nga makaangkon it COVID-19 pandemic.
Sa pihak kara, indi sa gihapon maduea ro mga scammers ukon nagapangloko online.
Ag parehong seller ag buyer ro nagiging biktima.
Mag-eowas sa order nga bayad eon apang owa pa na-deliver ukon nagapa-reserve it produkto apang owa man ginbo-oe, modus man ro paggamit sa identity it online shopper agud nga makapangloko pa it iba.
Rason nga nagapanawagan makaron sa natungdan nga mas pabaskugon ro pagtugis sa mga online scammers.
Kinahangean man nga may masampolan it grabe agud nga indi pamarisan.
Sa pihak kara, ro apela sa mismong social media platforms kun sa siin nagakatabu ro transaksyon.
Kabay nga makaangkon man sanda it responsibilidad kun paalin nga mapugngan ag matumod ro mga manugloko online.
Ro padumdum man sa kada seller ag buyer, maging madahan ag kon engkaso nga mabiktima, insigidang makipag-angot sa mga awtoridad.
Kabay nga indi magkanugon sa oras ag effort nga maka-report ag makipagkooperasyon hasta nga madakpan ag mapasabat ro mga pasaway online.
