Mas ginpadali ag ginpadasig eon ro pagbuoe it annotated PSA copies it mga civil registry document matapos ilunsar it Philippine Statistics Authority (PSA)-Aklan ro Premium Annotation Service sa CRS outlet ko Enero 29, 2026.
Ro bag-ong serbisyo hay nagatuyo nga padasigon ro pagproseso it mga anotasyon sa birth, marriage, ag death certificates nga naitama sa idaeom it Republic Act No. 9048 ag RA No. 10172, kaibahan ro mga clerical ukon typographical errors, pagbag-o it unang pangaean, pati eon man ro pagtama it petsa it pag-onga ag kinatawo.
Sakop man it nasambit nga serbisyo ro mga supplemental reports, court decrees, legitimations, ag iba pang legal nga dokumentong nagakinahang-ean it anotasyon.
Suno kay Engr. Antonet Catubuan, Chief Statistical Specialist it PSA-Aklan, kaparte raya it inisyatibo it gobyerno sa idaeom it Ease of Doing Business agud makatipid sa oras it mga kliyente, eabi eon kat insigidang nagakinahang-ean nga maitama ro dokumento.
Sa pinaagi it Premium Annotation Service, pwedeng direktang magsumite it aplikasyon sa CRS outlet, subaybayan online ro status kara ag mabuoe ro annotated document nga nakaimprenta sa Security Paper (SECPA) nga pwedeng gamiton sa lokal ag internasyonal nga transaksyon.
Agud makapag-avail, kinahang-ean nga mabuoe it mga dokumento halin sa Local Civil Registry Office (LCRO) kon sa siin gindihon ro koreksyon, kaibahan ro approved petition, certificate of finality, kopya it LCRO-annotated document, ag iba pang requirements nga ro kada transaksyon hay target nga matapos ro proseso sa sueod it 10 working days.
